တစ်ခါက ဆိုင်တစ်ဆိုင်မှ ဖုန်းဝင်လာပါတယ်။ "ဟဲလို- ခင်ဗျားဟာ မင်းမင်းရဲ့အမေပါလား။ ခင်ဗျားသားက ကျွန်တော်တို့ဆိုင်က ပစ္စည်းကို ခိုးထားပါတယ်။ ကျေးဇူးပြု ၍ ခင်ဗျားအခုချက်ချင်းလာခဲ့ပါ"ဟု ဖုန်းထဲကနေ စိတ်ဆိုးဒေါသထွက်သံဖြင့် ပြောလာပါတယ်။ မဒမ်လင်းမှာ ခဏတာတွေဝေသွားပါတယ်။ တစ်ဘက်ဆီမှ မခံမရပ်နိုင်တဲ့အဆုံး "ဟဲလို ခင်ဗျားကြားကောကြားပါရဲ့လား"လို့ ပြန်မေးလိုက်တဲ့အခါမှ သူမလည်း အလျင်အမြန် ဆိုင်လိပ်စာကို ချရေးလိုက်ပြီး လက်ဆွဲအိတ်ကိုယူကာ ခပ်သုတ်သုတ်ထွက်လာခဲ့ပါတော့တယ်။
အဆိုပါဆိုင်ရဲ့ အလုပ်ရုံထဲမှာ သူမကိုခုနကဖုန်းလှမ်းဆက်တဲ့ လုံခြုံရေးဝန်ထမ်းကို တွေ့ရသလို ထောင့်တစ်နေရာမှာ ပုန်းပြီး တုန်ရီနေတဲ့မင်းမင်းဆိုတဲ့ကောင်လေးကိုပါ တွေ့မိပါတယ်။ မင်းမင်းကခေါင်းလေးမော့ကာ ကြောက်လဲကြောက်၊ အကူအညီမဲ့နေတဲ့မျက်ဝန်းနဲ့ သူမကိုအားကိုးတကြီးကြည့်နေပါတယ်။ "မင်းမင်းဘာပစ္စည်းများ ယူမိပါသလဲ သိပါရစေ"လို့ သူမ မဆိုင်းမတွမေးလိုက်ပါတယ်။ အဆိုပါလုံခြုံရေးဝန်ထမ်းက စာအုပ်တစ်အုပ်ကို ခပ်မြင့်မြင့်ကိုင်မြှောက်ကာ "ဟောဒီမှာ ဒီဟာပဲ။ သူကဒီစာအုပ်ကို အကျီင်္ထဲမှာဖွက်ထားတာ။ ငါတို့မမြင်နိုင်ဘူးလို့ ထင်နေတာ။ ဟင်း....."ဆိုပြီး ပြောပြပါတယ်။
မဒမ်လင်းက လုံခြုံရေးအရာရှိကို တောင်းပန်စကားပြောပြီး ကျသင့်ငွေပေးချေကာ အဲဒီစာအုပ်ကို ဝယ်လိုက်တော့မှ အမှုမဖွင့်ဖို့ သဘောတူလက်ခံလိုက်ပါတယ်။ မဒမ်လင်းက မင်းမင်းရဲ့အေးစက်တဲ့လက်ကိုတွဲပြီး ဆိုင်အပြင်ဘက်ထွက်လာပြီးနောက် အဲဒီစာအုပ်ကို မင်းမင်းကိုပေးလိုက်ပါတယ်။ မင်းမင်းခေါင်းကို ပွတ်သပ်ကာ "ဒီစာအုပ်ကိုသဘောကျတဲ့ကလေးက သေချာပေါက် ရိုးသားဖြောင့်မတ်ပြီး စိတ်နှလုံးကောင်းတဲ့ လူကောင်းလေးတစ်ယောက်ဖြစ်မယ်ဆိုတာ ငါယုံကြည်တယ်။ ခုနက မင်းအရမ်းကိုကြိုက်လွန်းလို့ လက်မလွှတ်ချင်လို့ ယူမိလိုက်တာ ဟုတ်တယ်မလား"လို့ မဒမ်လင်းက ပြောလိုက်တယ်။ မင်းမင်းခေါင်းတဆတ်ဆတ်ညိတ်ကာ မျက်ဝန်းမှာ မျက်ရည်အရွှဲသားနဲ့ ရှက်ရွံ့စွာ "ဟုတ်ပါတယ်။ ကျွန်တော်တကယ်ပဲ မပစ်ရက်နိုင်ဖြစ်ပြီး ယူ
မိတာပါ။ နောင်ကို ကျွန်တော်ဒီလိုမျိုးထပ်မလုပ်တော့ပါဘူး"လို့ ဖြေပါတယ်။
အဲလိုနဲ့နှစ်ပေါင်းများစွာ ကြာလာပြီးနောက် တစ်နေ့မှာ မဒမ်လင်းထံ အမည်မသိလူစိမ်းတစ်ယောက်ထံမှ ဖုန်းဝင်လာပါတယ်။ "Andersen's Fairy Talesဆိုတဲ့ စာအုပ်ကို မှတ်မိသေးပါရဲ့လား"တဲ့။ ခဏတာအချိန်အတွင်း အတိတ်ကအချိန်များကို ပြန်တွေးကြည့်ရင်း တစ်ဘက်မှရုတ်တရက်ဝင်လာတဲ့ဖုန်းကို ဘယ်လိုပြန်ဖြေရမလဲဆိုတာ အမှန်တကယ်မသိတော့ပါ။ ဒါနဲ့ သူ့ကိုခင်ဗျားဖုန်းမှားဆက်နေတာ။ သေချာပြန်စစ်လိုက်ပါဦးလို့ ခွန်းတုံ့ပြန်လိုက်ပါတယ်။
မကြာပါ။တံခါးဘဲလ်မြည်လာပြီး လူရွယ်တစ်ယောက် တံခါးဝမှာလာရပ်နေပါတယ်။ ခုနဖုန်းက တကယ်ပဲ သူဆက်တာပါ။ သူကတော့ မင်းမင်းပါပဲ။ လတ်တလောနာမည်ရလာတဲ့ တက်သစ်စလူငယ်စာရေးဆရာတစ်ယောက်ပေါ့။ မင်းမင်းအိမ်ထဲဝင်လိုက်တာနဲ့ မဒမ်လင်းကိုအားပါးတရပြေးဖက်ကာ "ဒီဟာက ကျွန်တော့်ရဲ့လက်ရှိပုံနှိပ်ထုတ်ဝေထားတဲ့စာအုပ်ပါ။ အန်တီကို လက်ဆောင်ပေးတာပါ" လို့ ပြောပြီး သူမကို စာအုပ်တစ်အုပ်ပေးလိုက်ပါတယ်။ ပြီးနောက် "အဲဒီအချိန်တုန်းက ကျွန်တော့်မိဘတွေသာ ကျွန်တော်စာအုပ်ခိုးမှန်းပေးသိလိုက်ရင် သူတို့ကျွန်တော့်ကို ဘယ်လိုအပြစ်ပေးမလဲဆိုတာ မသိတော့ပါဘူး။ ကျွန်တော့ပါးစပ်က တွေ့ကရာပြောလိုက်တဲ့ ဖုန်းနံပါတ်တစ်ခုက မထင်မှတ်ဘဲ ကျွန်တော့်ကို ကယ်တင်လိုက်နိုင်တယ်။ ခင်ဗျားကိုကျေးဇူးတင်ပါတယ်။ မေမေ"လို့ ခေါ်လိုက်ပါတယ်။ မဒမ်လင်းလဲ ဝမ်းသာအားရရယ်မောလိုက်ပါတယ်။ ဒီကလေးကတော့ ကိုယ့်အမှားကိုသိပြီးနောက် ပြင်နိုင်ခဲ့တယ်။ သူမပေးလိုက်တဲ့အခွင့်အရေးကို တန်ဖိုးထားနားလည်တတ်လို့ပေါ့။
ဒီနေရာမှာ ကျွန်မဘာသင်ခန်းစာရသလဲဆိုတော့ မိမိအမှားကို သိသိချင်း အမြင်မှန်ရ၊ လမ်းမှန်ရောက်အောင်ကြိုးစားပြီး လူတော်ကောင်းတစ်ယောက်ဖြစ်အောင်ကြိုးစားရပါမယ်။ မိဘများအနေနဲ့လည်း မိမိသားသမီးအမှားလုပ်မိတဲ့အခါ ရိုက်နှက်ဆုံးမမဲ့အစား သူတို့လေးတွေကိုနားဝင်အောင် အသိတရားဝင်အောင် ဆုံးမသွန်သင်ပြီး အခွင့်အရေးပေးကာ စောင့်ကြည့်လေ့လာရပါမယ်။ တစ်ယောက်ကိုတစ်ယောက် နားလည်ခွင့်လွှတ်ပြီး ပွင့်လင်းစွာ တိုင်ပင်ဆွေးနွေးပါ။ ဒါမှသာ သားသမီးက မထိန်မဝပ်၊ မကြောက်မရွံ့ဘဲ မိဘထံမှ အကြံဥာဏ်များကို တောင်းယူရဲမှာဖြစ်ပါတယ်။ တလွဲဆံပင်ကောင်း စည်းကမ်းတင်းကြပ်ချုပ်ချယ်တဲ့မိဘအောက်မှာ ကြီးပြင်းလာတဲ့ကလေးများဟာ မိဘကြောက်လို့သာ နားထောင်နေရပြီး ကွယ်ရာမှာဖြစ်ချင်သလိုဖြစ်နေတာကို မိဘတွေမသိနိုင်ပါ။ အဆိုပါကလေးများဟာလည်း လွတ်လပ်ခွင့်ကိုတောင့်တပြီး စိတ်ထွက်ပေါက်ရှာကာ လမ်းမှားရောက် ဘဝရည်မှန်းချက်နဲ့ လွဲချော်သွားနိုင်ပါတယ်။ ဒါကြောင့် မိဘများအနေနဲ့ မိမိသားသမီးများကို မတိုးမလျှော့ဘဲ အုပ်ထိန်းစောင့်ရှောက်ကြပါလို့ တိုက်တွန်းပါရစေ။
စာကြွင်း- စင်ကာပူတရုတ်စာသင်ရိုးမှ လေ့ကျင့်ခန်းစာပိုဒ်ကို မိမိဘာသာဆီလျော်စွာ ဘာသာပြန်ထားပါတယ် :)
No comments:
Post a Comment